Si to krwar sa pa konsern twa… lir mem.
Si to krwar to pa konn personn dan sa sitiasyon-la… lir mem. Parski violans domestik pa fer tapaz touletan. Souvan li fer silans.
1️⃣ Enn prizon san baro
Violans domestik pa koumans avek kout baton. Li koumans avek kontrol. Avek laper. Avek silans. Silans kan to krwar kiksoz pou sanze.
Silans kan to krwar se twa ki bizin fer plis zefor. Silans kan to gard lespwar. Bann fam viv dan sa prizon-la pandan plizir lane. Pa parski zot pa ena kouraz. Me parski zot krwar zot pena lot swa.
2️⃣ “Mo reste pou mo zanfan”
Sa fraz-la, li rezonn partou, dan bokou lakaz.
💬 “Mo krwar mo pe protez zot.”
💬 “Mo pa anvi mo bann zanfan grandi san zot papa.”
Me kestyon-la difisil :
👉 Eski enn zanfan proteze kan li grandi dan laper ?
👉 Eski enn lakaz san tapaz, me ranpli avek tansion, li enn lakaz an sekirite vremem ?
Zanfan pa bet. Zot tann kriye. Zot trouv larm. Zot santi laper. Ek seki zot aprann, zot krwar li normal.
Violans domestik koumans avek kontrol
3️⃣ Repitasyon ek “ki dimounn pou dir”
Dan nou sosyete, enn fam bizin fer fas bokou prezize ek zizman.
Fam divorse = enn fam kinn rat so lavi.
Fam ki kit so mari = enn fam problem.
Fam ki pran kouraz koze = enn fam ki rod latansyon.
Alor, zot pena swa, zot reste. Zot ser leker. Zot fer lantouraz krwar tou korek.
📸 Lor rezo sosyo : sourir, foto fami parfe, zoli kad familial.
🏠 Deryer laport : menas, kriye, laper.
👉 Ki valer enn repitasyon kan li kout to lasante mantal ?
4️⃣ Lantouraz ki zize san kone
Souvan, se lantouraz ki fer plis dega. Bann dimoun krwar zot kone. Zot krwar zot konpran. Zot krwar zot ena drwa zize.
💬 “Li bizin inn fer kiksoz sa.”
💬 “Mari-la enn bon dimoun li, li pa kapav fer sa.”
💬 “Li fol sa. Tro get film.”
Bien rar tann sa kestyon-la :
👉 Kifer li ress krwar li pou sanze?
👉 Kifer li fer swa reste ?
Kan sosyete defann bouro, viktim pena lot swa apart sibir.
5️⃣ Lalkol, ladrog ek exkiz “malad mantal”
Enkor bann rezon ki kontinye nouri lespwar :
💬 “Li pa move, li bwar.”
💬 “Li droge li pa li-mem.”
💬 “Li ena problem mantal.”
Me kestyon-la reste :
👉 Eski sa explik, ouswa sa zistifie violans ?
Maladi mantal pa enn permi pou bate. Lalkol pa enn exkiz pou fer dimoun per. Kan minimiz violans, fam-la krwar ki sa enn zafer normal.
6️⃣ Solitid ek mank soutien
Port plint pa fasil. Koze pa fasil. Explike pa fasil. Selman, fam-la bizin krwar ki so lavi kapav sanze. Si li gagn dout, ek li konsantre zis lor sa, li retourn dan silans.
7️⃣ Zanfan : bann temwin ki pey enn pri tro ser
Violans domestik pa arete avek enn koup.
Bann tifi grandi avek konviksyon ki :
💬 “Konstrir enn lavi an koup vedir soufer.”
💬 “Si li zalou, li kontan mwa.”
Bann garson grandi ek krwar ki :
💬 “Bat fam fer parti bann rol enn vre zom viril.”
💬 “Papa ti fer li, mama ti aksepte.”
Violans vinn enn model. Enn zafer ki transmet.
8️⃣ Laverite deryer silans
Kan enn fam reste, pa krwar li kontan. Pa krwar li pa panse kitsoz kapav sanze. Pa krwar li pena lespwar. Silans souvan enn stratezi pou sirviv. Me silans osi enn prizon. Ek enn prizon, li pa ouver tousel.
9️⃣ Enn mo pou bann fam ki lir sa
Si to rekonet twa dan sa bann liny-la…
To pa tousel.
To pa fol.
To pa enn esek.
Violans pa apel lamour. Laper pa enn fondasyon pou enn fami.
Ek si azordi to krwar kapav ena sanzman, koze, rod led. Parski kan silans vinn enn prizon, enn lavwa kapav vinn premie lakle.
